رواية صراحة مدعومة

صراحة مدعومة ..
الحلقة 1
بقلم طارق اللبيب ..
السلام عليكم ياحاج عمر ..
قال ليهو عليكم السلام ادريس .. وين ياخي ليك زمن مان شايفنك ان شاء الله روقة ياخي؟ .. قال ليهو والله الحمد لله اخدت لي سفرة كدي وجيت كيف انت وكيف صحتك؟
قال ليهو والله الحمد لله ..
ادريس جا لحاج عمر في مكان ..زراعتو وداير يتكلم في موضوع ..كدي النسمع نشوف الحاصل شنو؟
قال ليهو والله ياحاج عمر جاييك في موضوع .. كدي خت الطورية دي.. وتعال لي جاي على الضل ..
حاج عمر قال ليهو حبابك والله .. النفك الفطور ده.. تفطر معاي .. قال ليهو انت لاهسي ياحاج عمر مافطرت ؟؟ نحن الحمد لله فطرنا وشربنا الشاي والقهوة .. ياخي الساعة ماشة على 12 ..
قال ليهو والله انشغلت مع الجدول ده.. مقفول بالقش .. حامي الموية تمشي .. والله ناسي نفسي شبعان ولا جعان .اكان ما جيتك دي.. لاهسع ما كون جايب خبر ..
اها قول خبرك شنو؟ .. ان شاء الله خير ..
ادريس قال ليهو يازول خير تب.. انت خت فطورك وافطر .. وانا بنتظرك.. قالو الكلام مع الزول جيعان مو سمح ..
المهم حاج عمرقعد يفطر .. وادريس شايل ليهوعود..بشخت في الواطة .. وساكت ساي .. حاج عمر قال في نفسو والله الليلة ادريس ماهو براهو .. الزول ده شايل ليهو هم وكلام كبير خلاص ..كدي الناكل سريع واشوف خبرو ..
غايتو سريع سريع.. الراجل لقم ليهو قلم كبار .. من ملاح البامية المفروكة .. مع الكسرة وغسل ايدو وشرب .. ولم المواعين .. ربطهن في فوطتهن الجابوهن فيها .. وجا قعد اتفرجخ في الواطة ..
وقال ليهو اها جيتك آدريس اخوي .. قول انا سامع ..
قال ليهو الحقيقة والله انا جاي شاكي ليك ولدك الباقر ده .. قال ليهو ولدي انا؟ الباقر؟ مالو ان شا الله خير؟ ..
قال ليهو والله الولد باقي لي بتي هنادي في رقبتها .. كل مايلاقيها في شارع يتكلم معاها .. ويشاغلها .. وهي الله يحفظها مابتدس علي حاجة .. اي كلمة قالا ليها كلمتني بيها .. وانا بقول ليها ماتردي عليهو .. امشي بس ..
لكن الزول ده كترها.. وانت عارف انا زول احمق.. وابرتي مابتشيل خيتين .. وبعد كدي خلاص ضاقت بي.. دحين امسك ولدك من بتي ياحاج عمر ..
وهسع اليومين ديل شغال معاها رسايل في الموبايل ..
وكل مرة البت تجيب الموبايل وتجيني وتقرا لي الكلام البكتبو ليها..
حاج عمر اتعدل في قعدته وقال ليهو ..
امكن ولدي دايرها .. بتك دي بت مابتتلقي في الزمن ده البت البتوري ابوها بي كل صغيرة وكبيرة على الطلاق دي بت زيها نادر
ازول اقول لك كلام أنا بتك دي دايرها لي ولدي الباقر ده .. شنو قولك؟ .. مادام عاجباهو بشاغل فيها.. خلنا النديها ليهو بالحلال ..
ادريس قال ليهو والله يا حاج عمر انت نسبك ما بنرفضو.. لكن ولدك البشاغل البنات ده مابنفع معانا .. انا بتي بت مابتقبل الخمج ومن هسي .. مابتقبل بي ولدك وانا بعرفها
بعدين ياخوي ولدك كان دايرها فعلا كان جابك وجا بالباب .. لكن شغلة المشاغلة والتغزل في بنات الناس دي والله ما حاجة بتشرف الراجل ..
قال ليهو والله يا ادريس الباقر ولدي زول كويس.. وماحصل في زول شكى منه الا الليلة .. والبنات كلهن بتمننو .. لكن بس اظنها بتك ملكت قلبو وغلبو الصبر ..
كدي انت ماتستعجل .. امشي اسأل البت .. وشوف ردها كان قالت لا
ماعندنا مشكلة ..وان وافقت دا والله ياهو المنى .. وانا اول زول بفرح بيها دي بت والله ما بتتخلا ..
قال ليهو والله انت ياحاج عمر كلامك ما بنزاد.. لكن والله ولدك ده انا تب مومطمني .. لكن مافي مشكلة ..انا بمشي بسأل البت وبشوف خبرها ..
قال ليهو امشي يا ادريس .. وانا من الليلة ولدي تاني بتك مابقرب من جيهتها .. اكان اديتونا ليها ولا ابيتو.. الا تبقى مراته ان واقفت ..قال ليهو تكرم ياحاج عمر وان شاء الله مانعدمك
مع السلامة ..
والنشووووف ..
الى اللقاء فى الحلقة الثانية

صراحة مدعومة .
الحلقة 2
بقلم طارق اللبيب ..
ادريس مشى البيت وقبل ما يتكلم مع بتو في اي موضوع .. كورك للمراة ام هنادي .. عمك ادريس عندو تلاتة بنات .. هنادي وهدى وسلسبيل الصغيرة .. وماعنده ولد .
زوجته اسمها منى بت الحاج .. المهم يازول .. كورك يامنى ؟ قالت ليهو ايوة سامعاك .. قال ليها انتي وين..
قالت ليهو انا في المطبخ .. قال ليها .خلي اي حاجة في يدك وتعالي ..
جات تمسح في يديها بي فوطة من البلل.. كانت بتسوي في شنو ما معرو ف
قال ليها اقعدي هنا يامنى .. قالت ليهو اها خير.. انت من تصر حواجبيك ديل .. وتطير عيونك؟؟ معناها جايب لك بلوى.. قول ..
قال ليها انا مشيت اتكلمت مع حاج عمر.. عن تصرفات ولده مع هنادي .. وقال قال قال ..
انتي رايك شنو قبل ما نسأل البت؟ ..
قالت ليهو والله عاد الموت حار.. الولد ده انا ماشايفة عليهو اي عيب.. زول في شغله.. وفي حاله.. ولو ما كلام هنادي ده .. والله ماكنت عارفة عليهو شي .. قال ليها والله انا ذاتي شايفو زول محترم شديد .. بس زي ماقلتي من حركاته مع هنادي دي كرهتو وكرهت جيهتو ..
يعني هسي انتي لو هنادي وافقت.. ماعندك مانع؟ قالت ليهو هنادي مابتوافق .. انا عارفاها ..
قال ليها كدي انتي جربي معاها .. انا لو قلت ليها بتوافق.. حتى لو ماعايزاهو لانها مابتكسر لي كلمة .. وانا دايرها تكون بي راحتها.. وتختار بي حريتها .. ماتجامل في حياتها .. لا ابوها ولاغيرو ..
منى قالت ليهو والله مرات انت عندك كلام حكم ..
قال ليها عليك الله خلي المطاعنة.. وامشي شوفي لي خبرها .. ادريس امهر نجار في المنطقة .. وبتو الكبيرة هنادي دي.. طلعت من المدرسة من تالتة ثانوي .. عشان تساعد ابوها لانو ماعندو اولاد ..
ماعندها علاقات ولاصداقات .. الا صديقة واحدة من الجيران اسمها شروق ..
ادريس عندو معرض في البيت فاتح في الشارع .. والورشة في عريشة جوة البيت .. بشتغل دواليب وسراير وحافلات وهلم جرا .. كتير مرات هنادي بتكون ماسكة المنشار او الفارة .. وشغالة في الورشة زي الراجل .. وهو بكون قاعد برة في المعرض ..
البت اتعلمت الصنعة وبقت ماهرة جدا .. وابوها مبسوط منها .. وطوالي بقول هنادي بتي وولدي ..
اختها الاصغر هدى مدلعة ومابتشتغل .. امها مابتساعدها جنها نوم .. حنكوشه شديد .. لكن زولة صادقة.. وماعندها لف ودوران .. ولسه بتقرا في الثانوي في تاني ..
وسلسبيل دي صغيرة في خامس .
اها قامت منى مشت تتكلم مع هنادي .. عشان تشوف رايها في الكلام الجديد ده شنو لقتها بتصلي في الظهر .. انتظرتها لمن صلت .. الزولة دي صلاتة طويلة وكتيرة المراة دي قاعدة قريب النص ساعة .. عشان البت تخلص وتجيها ..
انتهت من صلاتها.. ولمت المصلاية وعاينت لامها كدا .. قالت ليها مالك يا امي قاعدة متمحنة كدا. شكلك عندك كلام عايزة تقوليهو لي .. قالت ليها متمحنة في صلاتك الزي التراويح دي ..
قالت ليها في شنو يا امي احكي؟ .. الموضوع ماصلاتي .. اها ..
قالت ليها كويس تعالي يا هنادي ..
طبعا حصل حصل .. وعمك حاج عمر قال قال .. انتي رايك شنو؟
قالت ليها والله يا امي ما اكذب عليك .. انا الزول ده كرهتو وزهجت منو .. لانو ضايقني شديد .. وكرهني الشارع والتلفون .. مافي واحد من ناس الحلة بتكلم معاي غيرو ..
اها قالت ليها طيب احتمال الزول ده بريدك يا فلانة ..
قالت ليها بريدني.. مايجي يدق باب ابوي ؟ قالت ليها عايز يتاكد منك اول .. يشوفك انتي شعورك كيف ..
قالت ليها ابوي رايو شنو؟
قالت ليها ابوك قال الولد كويس .. وانا قلت كويس .. ماعارفين عليهو اي حاجة غير عوارتو المعاك دي ..
قالت ليها خلاص اديني فرصة افكر وبرد ليكم ..
لمن امها فاتت بقت تفكر .. ضربت تلفون لشروق .. قالت ليها انتي وين يا متخلفه؟ قالت ليها انا قاعدة في البيت.. مالك شكلك عندك مصلحة معاي.. مابتضربي لي الا يكون عندك مصلحة يا نجارة .. قالت ليها اي والله محتاجة ليك شديد.. تعالي في شمار ما بيقعد دقيقة الهوا بشيلو ..
ديك بس لفحت اقرب توب بتاع امها .. وكشتت سفنجة اختها بتاعة الحمام .. وجات ..
قالت ليها ازيو المافي زيو .. كيفك يا نجاره .. اها الشماااار شنو ؟؟
هنادي قالت ليها ينجروك دولاب .. تعالي اندمسي هنا أسالك ..
انا مش حكت ليك عن حركات الود الاسمو الباقر ولا زفت ده؟
قالت ليها ايوة حكيتي لي.. اها مالو تاني عمل شنو الاهبل؟
قالت ليها كدي خليهو عمل شنو ؟ انتي قلتي لي الزول ده ماحصل عاين ليك معاينة ماياها كلو كلو صح ؟
عليك الله يا شروق احكي لي الزول ده . اوعا يكون تافه زيو وزي التانين ..
قالت ليها يعني انتي ما حنك معاك مثلا" بتكذبي علي؟
قالت ليها انا مابتكلم عني انا .. انا بتكلم عن انو هل ممكن يكون.. اتكلم مع بنات تاني غيري ..؟؟
شروق قالت ليها .. عليك الله ماتوتري لي اعصابي وتخليني اقوم اديك كف .. وريني الحاصل شنو؟
قالت ليها ياستي الراجل ابو الباقر.. قال لابوي دايرين بتك هنادي للباقر..
شروق قالتليها .. اوورووورك .. خلاص يايمة الود ترا جادي ..
وماشغلة شفع ..
قالت ليها الجدادة التمعطك .. يامتخلفة.. كدي انتي افهمي اول وبعدين قولي اورورووك ..
الموضوع انو ابوي مشى ليهو اول.. وكلمه بحركات ولده معاي. قالت ليها انتي ياعبيطة مشيتي كلمتي ابوك؟
قالت ليها ابوي صاحبي .. وانا خايفة الكلام يصله من حتة تانية . احسن يكون عارف البحصل ولاشنو؟
قالت ليها والله افكارك عينة طيب .. اها وطوالي قال ليهو نحن عايزنها ليهو؟؟؟ قالت ليها نعم ..
اها ياشروق والله انا متوترة .. وماعارفة اقول شنو؟ الولد شكلا عاجبني والله.. لكن خايفة يكون تافه وحقير .. وبعمل كدا مع البنات ..
شروق قالت ليها غايتو انا شخصيا ماحصل شفت منه شي .. لكن اقول ليك . طبعا انتي ماشاء الله عليك جمالك لايقاوم .. لكن انا مع شنو.. والبعاين لي منو .. كدي انتي علاقتك بي هدى اختك كيف؟
قالت ليها والله ياهو كلامنا في حدود .. انتي قصدك شنو يعني؟ ..
قالت ليها طبعا ياهنادي مع اعتذاري يعني.. هدى احلا منك هه.. ولو الود ده . لو فعلا تافه ح يكون اتكلم مع هدى برضو .. انتي اسألي منه هدى .. انا متأكدة انو هدى دي نص اولاد الحلة شاغلوها ..
قالت ليها والله ياشروق فكرتك دي قوية وشيطانية في نفس اللحظة ..
جدا خليني ادردق ليك هدى .. حتى لو ماهي ممكن تكون عارفة عن واحدة من صحباتها ..
شروق قالت ليها غايتو ياهنادي الزول ده لو طلع ماسورة تبقى مغسة .. والله انا دايراهو ليك.. لانه غايتو شكلو يجنن .. لكن الكلام على الجوهر على قولك ..
المهم ياجماعة البنات اتونسن كويس .. شروق وهنادي.. واتفقو على انو هنادي تحاول تعرف حاجة من اختها هدى .. هدى لسه في المدرسة ..
لمن جات المدرسة لابسة .. اللبس الرمادي .. وشايلة شنطة مرسوم عليها واتساب . هدى طالعة لامها منى .. زولة بتحب المنجهة .. ومتمدنة .. لانو منى اصلا من الخرطوم مولودة في الجريف غرب .. ادريس كان صاحب خالها واتزوجها وجا سكنها هنا في الريفي الشمالي لامدرمان ..
مسافة الحلة دي مابعيدة من امدرمان اصلا ..
يعني بتعتبر مدينة عديل. يهودا الزلط من هنا خمسة شوارع .زلط الكلية الحربية البمشي بي غرب النيل من شارع الوادي لغاية المتمة بس المنطقة قريبة من امدرمان .. بالمنسبة ناس المنطقة ديك ناس عجيبين خلاص .. لسع بي طيبة البلد والتمدن ما اثر فيهم ..
ياخي ديل في الزواج بكيلو اللحمة بالكوريك للضيوف ..
المهم يازول هنادي نادت اختها قالت ليها تعالي يا حبيبة اختها .. هدى عاينت ليها كدا بطرف عينها وقالت ليها .. من متين ياعيني الحنية دي ؟ لالا لازم عندك هدف سامي عايزاهو مني ..
قالت ليها ايييواا صحيح ..
جات هدويه قعدت بهدوم المدرسة ..قالت ليها اها خلصيني انا مسخنة ودمي فاير ..
قالت ليها ياستي عايزة اسألك من الباقر عمر .. بتعرفيهو صح؟؟
قالت ليها بعرفو ايوة مالو؟
قالت ليها الزول ده رايك فيهو شنو؟ يعني عندي صحبتي بتسأل منه ..
قالت اتقدم ليها وكدا.. انا غايتو قلت ليها الزول ده سئ وبتاع بنات ..
هدى قالت ليها وانا علاقتي شنو بالموضوع؟؟ يعني انا بجيب اخبار الاولاد السخف ؟
قالت ليها لالا ياهدو انتي مفتحة.. وعارف البلد والحاصل فيها .. وعندك صاحبات مازي انا.

الى اللقاء فى الحلقة الثالثة.